Dheere dheere unke kaale baal safed hone lage hai,
Baat karte huye achanak ruk kar kuch sochne lagte hai,
Chashmah khud maathe par tika kar; fir poore ghar mein dhoondne lagte hai,
Dhoop mein newspaper padhte huye; baithe baithe so jaate hai,
Log kehte hai umar ho rahi hai tumhare papa ki,
Par unhe kya pata mere papa kabhi boodhe thodi ho sakte hai.
Ab pehle ki tarah samose kachori nahi khaa paate hai,
Diabetes hone ke bawajood chupkar mithayi churate hai,
Chhote bacho ki tarah baat baat par zidd karte hai, ladte hai,
Bazaar tak jaakar bhi thakaan se choor ho jate hai,
Fir khud hi kehte hai “Ab umar ho gayi hai shayad”,
Par papa ko bhi kya pata ki mere papa kabhi boodhe ho hi nahi sakte hai.
Pata nahi aaj kal sabke insurance details kyu bhejne lage hai,
Chaahe gaadi chalana ho yaa bank jaana,
Ab mujhe aagey karne lage hai.
Baar baar bolte hai seekh lo ab yeh sab, samajho yeh sab,
Umar ho rahi hai tumhare papa ki, kal naa bhi hu toh tumhe aana chahiye,
Unki baat ko sune bina hi keh deti hu,” Papa aap kabhi boodhe ho hi nahi sakte hai.”
Agar bewaqt so jaaye yaa do baar bulane par bhi jawab na de,
Toh mujhe bhi ajeeb si ghabrahat hone lagti hai,
Gehri neend mein jab bacho ki tarah unhe sota dekhti hu,
Tab kabhi kabhi sochti hu ki kahi papa sach mein boodhe toh nahi hone lage hai,
Par fir yun hi khud ko firse mana leti hu,
Nahi nahi! Tere papa kabhi boodhe ho hi nahi sakte hai.